إنتا متخيل إننا بنحارب الربا عشان حاجة من اتنين . إما إننا دراويش واكلين فتة ومش فاهمين حاجة في الاقتصاد . اللي انتا فاهم فيه وعارف إن الربا ده إسمه العلمي ( آداة تمويييييل ) يا شوية جهلة ما عديتوش على محو الأمية في الاقتصاد . أو إننا بنعمل تريند وخالف تعرف عشان نتشهر ونتعرف إننا اللي بندافع عن الإسلام بقى وكده وبتاع . طيب تعالى احكي لك اتنين سيناريو عن الباب المصفح اللي راكب في الشقة اللي حضرتك رايح تشتريها . سيناريو في ظل عدم وجود الربا وسيناريو في ظل وجود الربا . السيناريو الأول / في ظل عدم وجود الربا . ١ ٠ مصنع الصاج عنده صاج قيمته ١٠٠٠ جنيه هيبيعه ب ١١٠٠ . ٢ . تاجر الصاج اشترى الصاج من المصنع ب ١١٠٠ جنيه وهيبيعه ب ١٢٠٠ . ٣ . شركة الأبواب المصفحة اشترت الصاج ده ب ١٢٠٠ جنيه . عملت عليه شغل قص وتني وكبس ودهان و و و . رفعت قيمته ل ١٥٠٠ جنيه . وهتبيعه ب ١٧٠٠ . ٤ . المقاول اللي بيشطب شقتك اشترى الباب ب ١٧٠٠ جنيه . وحسبه ضمن تكلفة الشقة ب ٢٠٠٠ . ٥ . حضرتك اشتريت الشقة . كان محسوب من ضمن سعرها ٢٠٠٠ جنيه تمن الباب المصفح . السيناريو التاني / في حالة وجود الربا . ١ . مصنع الصاج عنده صاج قيمته ١٠٠٠ جنيه هيبيعه ب ١١٠٠ جنيه . ٢ . تاجر الصاج خد قرض من البنك ب ١١٠٠ جنيه عشان يشتري الصاج من المصنع هنا تاجر الصاج بقى مطلوب منه يسدد للبنك ١٣٠٠ جنيه . ١١٠٠ أصل المبلغ . و ٢٠٠ ربا ف تاجر الصاج باع الصاج ب ١٤٠٠ جنيه . ٣ . شركة الأبواب المصفحة خدت قرض من البنك بقيمة ١٤٠٠ جنيه عشان تشتري الصاج المبلغ ده عليه ٣٠٠ جنيه ربا ف أصبحت الشركة مطالبة بسداد ١٧٠٠ جنيه قيمة القرض . ونفس الشركة خدت قرض ب ٣٠٠ جنيه عشان تصرف على الأجور و و و المبلغ ده عليه ٥٠ جنيه ربا ف المفروض يرجع ٣٥٠ كده الشركة تكلفت ٢٠٥٠ جنيه ف هتبيع الباب ب ٢٣٠٠ جنيه . ٤ . المقاول خد قرض ب ٢٣٠٠ جنيه عشان يشتري الباب المبلغ ده عليه ٥٠٠ جنيه ربا . ف هيرجع ٢٨٠٠ جنيه للبنك . وهيحسب سعر الباب داخل سعر الشقة ب ٣١٠٠ . ٥ . حضرتك وانتا بتشتري الشقة . كان الباب ده محسوب عليك ب ٣١٠٠ جنيه . حضرتك هتروح تاخد قرض من البنك ب ٣١٠٠ جنيه المبلغ ده عليه ٦٠٠ جنيه ربا ف أصبحت حضرتك مطالب بسداد ٣٧٠٠ جنيه . في المثال السابق بالاتنين سيناريو بتوعه حضرتك من غير ربا كنت هتدفع ٢٠٠٠ جنيه بالربا دفعت ٣٧٠٠ جنيه . مش دي المشكلة تعالى نبص للموضوع من منظور تاني ألا وهو . الصاج في الحالتين كانت قيمته ١٠٠٠ جنيه . من غير ربا . فيه ٥ أشخاص كسبوا من الصاج ده ٧٠٠ جنيه طوال رحلته للوصول للعميل . فيه ٣٠٠ جنيه مش محسوبين ربح عند مصنع الأبواب المصفحة . دي فلوس اتصرفت على أجور عمال وطاقة وصيانة ونقل إلخ ف رفعت قيمة الباب . مش ربح صافي يعني . مع وجود الربا فيه ٥ أشخاص كسبوا من الصاج ده ٧٥٠ جنيه بينما !!! البنك كسب ١٦٥٠ جنيه وفيه ٣٠٠ بردو مش حاسبينهم في الأرباح . يعني القيمة المضافة على الصاج . ال ٢٤٠٠ جنيه . الناس اللي اشتغلت وتعبت . خدت تلتها تقريبا . والبنك خد التلتين !! . البنك ده جايب الفلوس منين ؟! من ناس كانت ممكن تشتغل . ف تعمل منافسة . ف تنزل سعر الباب من ٢٠٠٠ ل ١٨٠٠ أصلا لكن الناس دي قررت ترتاح وتحط فلوسها في البنك . والبنك عطاهم جزء من الربا وخد الباقي . ف إحنا خسرنا المنافسة اللي هتقلل الأسعار ل ١٨٠٠ جنيه . وخسرنا بسبب ارتفاع سعر الباب من ٢٠٠٠ ل ٣٧٠٠ يعني عمليا إحنا بندفع ضعف تمن البضاعة . بندفع ٣٧٠٠ بدلا من ١٨٠٠ لنفس الباب !! . والأرباح تلتها بيروح الي بيتعب . والتلتين للبنك . لكن طبعا احنا دراويش وواكلين فتة ومش فاهمين حاجة في الاقتصاد . لسه عايشين في العصر الحجري ومش عارفين يعني إيه ( أدوات تمويل ) . ومن الناحية الشرعية مش قادرين نفهم إن العلاقة بين البنك والشركات هي شششرررررراااااككككككة . مش ربا ولا حاجة . الربا ده كان في الدهب والفضة زمان . إنما اللي في إيدينا دي مش فلوس . دي كده وكده . إنتا بس اللي مش فاهم يعني إيه فقه الواقع ومش فاهم مقاصد الشريعة . بتشوف الظاهر فقط . مانتاش قادر تفهم الفرق بين القانون وروح القانون مشكلتك إنك بتتمسك بالنقل بدون إعمال العقل . إنتا مشكلتك إنك ما بتسألش أهل الذكر في الاقتصاد قبل ما تتكلم عن العلاقة بين الدين والاقتصاد . ديننا دا حلو قوي . وسمح قوي . مستحيل يكون بيحرم حاجة هيا في الأصل آداة تمويل معمولة لراحة البشرية . قال تعالى يَا أَيُّهَا الَّذِينَ آمَنُوا لَا تَأْكُلُوا الرِّبَا أَضْعَافًا مُّضَاعَفَةً ۖ وَاتَّقُوا اللَّهَ لَعَلَّكُمْ تُفْلِحُونَ #منقول #عن #صفحة المكتب المصري للتطوير الصناعي